ကိုရင်မောင်ကို နောက်ပြောတယ် မထင်နဲ့ အရပ်ကတို့ရေ…တကယ်ပြောတာ။ မယုံရင် ကြည့်နေ။ နှစ်ကုန်ကာလကြရင် မီဒီယာတွေက မှတ်မှတ်သားသား စကားများဆိုပြီး လွှတ်တော်နဲ့ အစိုးရက ရယ်စရာ ပြောခဲ့တာတွေကို ကောက်နုတ် ဖော်ပြကြလိမ့်မယ်။ ဘာတဲ့…ဂျက်လေယာဉ်ကြီးလို ဖြစ်မယ်တို့၊ စင်ကာပူကြီး လို ဖြစ်မယ်တို့ ၀န်ကြီးတွေက ဟာသတွေ ပြောခဲ့သလို အိမ်ခြံမြေဈေး ထိန်းလို့ စီးပွားတတ်တယ်ဆိုပြီး ခြင်ထောင်ထဲက အချက်အလက်တွေနဲ့ ဟာသတွေ ထထလုပ်သူက ရှိသေး။ ပြည်သူတွေ လက်ထဲ ဖွတ်ကလိ ဒင်္ဂါးခမ်းနေပြီး အလယ်အလတ်အဆင့် ခရိုနီ၊ ခရိုပြာ၊ ခရိုဝါတွေတောင် မလှုပ် မရှုပ် မပြုတ်ထုံး နှလုံးမူပြီး စီးပွားရေး ထပ်မတိုးချဲ့နိုင်တဲ့သတင်းတွေက ပလူကို ပျံလို့။
အရေးအကြောင်းရှိတိုင်း အစွယ်ဖြဲပြ၊ သေနတ်ထုတ်ပြ လုပ်နေရင်ဖြင့် ယနေ့ခေတ်က အများမျှော်လင့်သလို ဒီမိုကရေစီခေတ် မဟုတ်ကြောင်း သက်သေထူလိုက်ခြင်းသည့် မှတ်တမ်းဝင်သွားမည် ဖြစ်...မကြာခင်က လုပ်သွားတဲ့ အကယ်ဒမီပေးပွဲဆိုလည်း ရယ်ချင်ရဲ့ လက်တို့နဲ့ ပြည်သူကို အသုံးတော် ခံသွားသေး တယ် မဟုတ်ပါလား။ လူထုက တဟီးဟီး တဟားဟားနဲ့ ရယ်စရာတွေကို အနုပညာရှင်များက ဖန်တီပေးကြ ကုန်ရဲ့။ အနုပညာရှင်တွေ ၀တ်တဲ့ အ၀တ်အစားကို ကြည့်ပြီး ဟာသတွေ နှောခဲ့ရသလို ပြောစကားတွေကို နားထောင်ပြီး ရယ်မောခဲ့ရတယ် မဟုတ်လား။
ဘာတဲ့…စန္ဒရားတင်ဝင်းလှိုင် ပြောခဲ့တဲ့ စကားဆိုရင် လူအတော်များများ ပြုံးမိရတာပဲ မဟုတ်လား။ ဘာတဲ့ သူ ပြောခဲ့တဲ့ စကားက။ “ခင်ဗျားတက်လာမှ ကျွန်တော် ခွေးလုံးလုံး ဖြစ်နေတယ်” ဆိုတဲ့ သူ့စကားကို ကိုးကားလို့ မီဒီယာတွေကတောင် ရေးကြ သားကြ၊ အဲဒီသတင်းကို လူမှုကွန်ရက်မှာ ဝေကြ မျှကြ ရှယ်ကြနဲ့ ပွတ်လောကို ရိုက်လို့။ ဒီစကားကြောင့်လေလား မသိ။ စန္ဒရားဆရာကို ထပ်ဆင့် အင်တာဗျူးတွေ မေးကြ မြန်းကြ ဗျူးကြနဲ့ ပွတ်လောရိုက်ကုန်ကော မဟုတ်လား။ သူ့စကား အပြည့်အစုံကို သိချင်ရင် လူမှုကွန်ရက်ပေါ်မှာ ပြန်ရှာကြည့် ကြဗျာ…။ ထပ်နားထောင်ပြီး သဘောခွေ့နေမှဖြင့် ကိုရင်မောင် ရယ်မဆုံးဖြစ်ကုန်ရင် ဆောင်းပါးကို အဆုံးသတ် နိုင်မှာ မဟုတ်တော့ဘူး။
သူ့စကားကို မခံသာတဲ့ ပြန်ဝန်ဌာန လူဟောင်းတွေကလည်း ချက်ချင်းဆိုသလို လူမှုကွန်ရက် မုခမျက်နှာကနေ ရှင်းကြ၊ ပြောကြဆိုတော့ အတော်လေးပွဲဆူခဲ့တဲ့ကိစ္စ။ ဟော…ဒါတင်လား မဟုတ်နော်။ ပြန်ဝန်ဌာနက ဒီအညတြ စန္ဒရားဆရာကို စိတ်ခုတော် မူပြန်တော့ တော်လှန်ရေးနေ့မှာပဲ စတင် တော်လှန်မှု ပြုတော့တာပါပဲ။ (အညတရ စန္ဒရားဆရာလို့ သုံးလို့ တစ်မျိုး မထင်နဲ့ကွယ်ရို့…။ နိုင်ငံတော်အဆင့် တော်လှန်မှုကိစ္စ ဖြစ်လာလို့ အညတရလို့ သုံးခြင်းသာ မည်၏ဟု မှတ်ယူပါကုန်…) အိတ်ဖွင့်ပေးစာ တစ်ဖုံ၊ ဒီလိုစွပ်စွဲမှုနဲ့ အခုလို ပြောဆို မှုအပေါ် မမှန်မကန် ထပ်ဆင့်စွပ်စွဲချက်တွေ လုပ်ဆောင်သူကို တည်ဆဲဥပဒေနဲ့အညီ ဆောင်ရွက်မယ်ဆိုပြီး ပြည်သူ့ဖွတ်ကလိဒင်္ဂါးနဲ့ ထုတ်တဲ့ နိုင်ငံပိုင်သတင်းစာကြီးနှစ်စောင်ကနေ ခြိမ်းသံ၊ ခြောက်သံ၊ အမြောက်သံ ပေးလာပါလေကော။
ကဲ…တတ်နိုင်တော့ဘူးဗျာ…။ ကိုရင်မောင်လည်း တည်ဆဲ ဥပဒေဆိုတာချည်းကို ကြောက်ကြောက်နဲ့ပဲ ပြောရ တော့မယ်။ အခုကိစ္စက ပြန်ဝန်ဌာနကို လာမထိနဲ့…မီးပွင့်သွားမယ်ဆိုတာနဲ့ မတူနေပါပကောလား။ မြန်မာမဆန် လိုက်တာ။ အခုလုပ်ပုံက သိပ်ကို အနောက်တိုင်း ဆန်လိုက်တာနော်။ ပရိသတ်ကြီး သိတယ် မဟုတ်လား။ အနောက်တိုင်းမှာက ကောင်းဘွိုင်စတိုင်လေ။ ပြဿနာတစ်ခုဖြစ်ရင် ခြောက်လုံးပြူးထုတ်ပြီး ဖြေရှင်းချင်တဲ့ ကောင်းဘွိုင်ထုံးစံလေ။ ငါ့လာမထိနဲ့…ထိလို့ကတော့ လာထား…ဒိုင်းညောင့် ဒိုင်းညောင့် ဒိုင်းညောင့် ပုံစံဖြစ်မ နေပေဘူးလား။
ကိုရင်မောင် သိထားတဲ့ ယဉ်ကျေးတဲ့ ဒီမိုကရေစီတိုင်းပြည်မှာ အစိုးရဌာနတစ်ခုက စွပ်စွဲခံရရင် မီဒီယာတွေကို ဖိတ်၊ စွပ်စွဲခံရမှုက မဟုတ်မှန်ကြောင်းကို သက်သေသာဓက အထောက်အထားတွေနဲ့ ဖြေရှင်းကြတာချည်းပါပဲ။ ဘယ်နှဲ့ အညတရစန္ဒရားဆရာက ပြောဆိုမှုအပေါ် ဒီမိုကရေစီစံနှုန်းနဲ့ မဖြေရှင်းဘဲ သေနတ်ထုတ် မောင်းဖြုတ် ချင်တဲ့ ကောင်းဘွိုင်စတိုင်တွေ သုံးလာပါလိမ့်လို့။ အေးလေ…အာဏာဆိုတာက သေနတ်ပြောင်းဝက လာတယ် ဆိုတဲ့အတိုင်း သေနတ်မကိုင်ရတဲ့ ဌာနဆိုတော့ နိုင်ငံပိုင်သတင်းစာ နှစ်စောင်ကို နှစ်လုံးပြူးလို သဘောထားပြီး အဲဒီကနေ ခလုတ်နှိပ်လိုက်လေသလားလို့ တွေးမိရဲ့။
နောက်ပြီး နှလုံးပြူးခလုတ်ကိုင်ပြီး ခြိမ်းခြောက်တဲ့နေရာမှာလည်း ခလုတ်နှိပ်ဖို့ ပြင်သူတွေက ဘယ်သူတွေမှန်း မသိ။ စန္ဒရားတင်ဝင်းလှိုင်သို့ အိတ်ဖွင့်ပေးစာဆိုပြီး ပြောသူက မြန်မာ့အသံနှင့် ရုပ်မြင်သံကြား ၀န်ထမ်းများတဲ့၊ စန္ဒရား (ဦး) တင်ဝင်းလှိုင်၏ မမှန်မကန် စွပ်စွဲပုတ်ခတ်ပြောကြားမှုနှင့် ထပ်ဆင့်စွပ်စွဲချက်များ လုပ်ဆောင်နေကြ သူများကို တည်ဆဲဥပဒေများနှင့်အညီ ဆက်လက်ဆောင်ရွက်သွားမည် ဆိုတဲ့ နေရာမှာ ပြန်ကြားရေးဝန်ကြီး ဌာန ပြောရေးဆိုခွင့်နှင့် သတင်းထုတ်ပြန်ရေးအဖွဲ့ဆိုတော့ ဘယ်သူတွေတုန်း။ မကြာသေးခင်က တက်တဲ့ ပြန်ဝန်ဌာနရဲ့ ဒုဝန်ကြီးက ဝေမျှထားလို့ ဌာန ပြောရေးဆိုခွင့်ရှိသူရယ်လို့ ကိုရင်မောင် သိထားတာက လေးဦးရယ်။ ဦးမျိုးမြင့်မောင်၊ ဦးမြင့်ကျော်၊ ဦးရဲနိုင်၊ ဦးကျော်ဇင်သန့် ဆိုတော့ အဲဒီ ပြောရေးဆိုခွင့်အဖွဲ့က ထုတ်ပြန်တာလား…ဒါတော့ ကိုရင်မောင် မသိ။ ကိုရင်မောင် သိတာ တစ်ခုတည်းရှိတယ်။ အဲဒါက ၀န်ကြီးဌာန တစ်ခုမှာ ပြည်ထောင်စုဝန်ကြီးက အမြင့်ဆုံး မဟုတ်လား။ ဒီတော့ ဒီကိစ္စကို ၀န်ကြီးက လက်မခံဘဲနဲ့တော့ မထုတ်ပြန်ဘူးလေ။ နောက်ပြီး ဒီကိစ္စ ဖြစ်လာတာကလည်း ၀န်ကြီးကို အညတရစန္ဒရားဆရားက လူမြင်ကွင်း Public ကြားမှာ ဝေဖန်လိုက်လို့ မဟုတ်ပေလား။
ဒီနေရာမှာ ကိုရင်မောင် ထောက်ပြချင်တာ တစ်ခုတော့ ရှိသဗျ။ အဲဒါက ယဉ်ကျေးတဲ့ တိုးတက်တဲ့ ဒီမိုကရေစီ နိုင်ငံတွေက လုပ်ထုံးလုပ်နည်း ပြောမလား၊ နိုင်ငံရေး ယဉ်ကျေးမှု ပြောမလား။ နာမည် တပ်ချင်တာ တပ်ဗျာ။ အဲဒါက အစိုးရ၀န်ကြီး တစ်ယောက်က လူကြားထဲမှာ စွပ်စွဲပြစ်တင်ခံရတယ်၊ အပုပ်ချ တိုက်ခိုက်ခံရတယ်ဆိုရင် တရားဝင် သတင်းစာရှင်းလင်းပွဲလုပ်ပြီး ရှင်းကြတဲ့ အလေ့အထကောင်းတစ်ခုပါ။ သတင်းစာရှင်းလင်းပွဲမှာ ကိုယ့်ဘက်က မှန်ကန်ကြောင်းကိုဖြင့် အချက်နဲ့ အလက်နဲ့ ရှင်း၊ ပြီးရင် စွပ်စွဲသူကို အရေးယူမယ့်အကြောင်း မီဒီယာကို ခေါင်းလောင်းထိုးရမှာ မဟုတ်ပေလား။ ဒါမှလည်း ဒီမိုကရေစီရဲ့ အဓိကအားသာချက်ဖြစ်တဲ့ ပွင့်လင်း မြင်သာမှုကြီးက ဘွားခနဲ ပေါ်လာမည် မဟုတ်ပေလော။ အခုတော့ ကောင်းဘွိုင်စတိုင် သေနတ်ထုတ် မင်းမလှုပ်နဲ့ဆိုတဲ့ လုပ်ပုံက ဒီမိုကရေစီခေတ် နိုင်ငံရေးယဉ်ကျေးမှု မရှိတဲ့ ပုံစံလို့ပဲ ကိုရင်မောင်တော့ မြင်မိသဗျာ။
အခုတော့ ဒီလို မဟုတ်ပါဘဲ … ဆိုပြီး ကိုရင်မောင်တို့ ငိုချင်းချရမယ့်အကွက်။ ဘာလို့လဲ သိလား။ အညတြ စန္ဒရားဆရာရဲ့ ပြောဆိုမှုကို လူမှုကွန်ရက်တင်မက မီဒီယာတွေမှာ ဖော်ပြနေမှုတွေနဲ့ ဆက်စပ်လို့ သက်ဆိုင်သူ ပုဂ္ဂိုလ်များအား တည်ဆဲဥပဒေနဲ့အညီ ဆောင်ရွက်သွားမည်ဆိုတော့ လန့်ရတယ်၊ ကြောက်ရတယ်၊ ငိုရ မယ်လေ။ အခန့်မသင့်ရင်ဖြင့် မီဒီယာတွေလည်း တည်ဆဲဥပဒေဆိုတာချည်းနဲ့ ငြိမှာလေ။ အရင့်အရင် ခေတ်ကလည်း သေနတ်ထုတ် ကောင်းဘွိုင်လုပ်တဲ့ အလေ့အထတွေကြောင့် မီဒီယာတွေ သင်းသပ်ခံရဖူးတဲ့ သာဓကတွေကလည်း မနည်းကိုး။ ထားတော့။
ကိုရင်မောင် အဓိက ထောက်ပြချင်တာက ဘယ်သူမှားသည်၊ မှန်သည် မဟုတ်။ လုပ်ထုံးလုပ်နည်း လွဲတာလေး ကိုပါ။ ကိုရင်မောင်တို့ လိုလားတဲ့ ဒီမိုကရေစီခေတ်မှာ နိုင်ငံရေးယဉ်ကျေးမှုကောင်းတွေ ဖြစ်ထွန်းရေးပါလို့။ ပြဿနာတစ်ခုဖြစ်လာရင် ငါဟဲ့…လုပ်လိုက်မဟဲ့နဲ့ ခြိမ်းခြောက်သလိုလို ကြိမ်းမောင်းသလိုလို လုပ်တတ်တဲ့ အာဏာရှင်ခေတ်၊ စစ်အစိုးရခေတ်ကို လွန်လို့ ဒီမိုကရေစီခေတ်ကို စတင်လှမ်းနေပါပြီလို့ လက်ရှိ တိုင်းပြည်အုပ် ချုပ် မင်းလုပ်သူအပေါင်းက တကြော်ကြော်နဲ့ ကြွေးကြော်ထားပြီးသားပါ။ ဒါပေမဲ့လို့ အညတရ စန္ဒရားရဲ့ ပြန်ဝန် ကို ပြောဆိုမှုကိစ္စမှာ အာဏာရှိတဲ့ ၀န်ကြီးဌာနဘက်က ကောင်းဘွိုင်ဆန်တဲ့ လုပ်ရပ်တွေ လုပ်တာတော့ မဖြစ်သင့်ပေဘူးလို့ သဘောရိုးနဲ့ ထောက်ပြပါရစေ။
သတင်းစာရှင်းလင်းပွဲ လုပ်ပါမယ်လို့ ပြန်ဝန်ဌာနရဲ့ ထုတ်ပြန်ချက်တွေမှာ ပါရှိပေမယ့် တကယ်တမ်းတော့ သတင်းစာရှင်းလင်းပွဲလုပ်ပြီးမှ ဒီထုတ်ပြန်ချက်ကို ထုတ်ခြင်းက ပိုပြီး သင့်တော်သလို ဒီမိုကရေစီအလေ့အထ ကောင်းတွေ စတင် ကျင့်သုံးရာလည်း ရောက်ပါလိမ့်မယ်။ ထစ်ခနဲရှိ အစွယ်ဖြဲပြတဲ့ခေတ်က ကုန်ပြီလို့ပဲ ပြောပါ ရစေ။ ဒီလိုမှ မဟုတ်ဘဲ အရေးအကြောင်းရှိတိုင်း အစွယ်ဖြဲပြ၊ သေနတ်ထုတ်ပြ လုပ်နေရင်ဖြင့် ယနေ့ခေတ်က အများမျှော်လင့်သလို ဒီမိုကရေစီခေတ် မဟုတ်ကြောင်း သက်သေထူလိုက်ခြင်းသည့် မှတ်တမ်းဝင်သွားမည် ဖြစ်ပါကြောင်း ကိုရင်မောင်က ဒီမိုကရေစီအကျိုးမျှော်လို့ နှိုးဆော်လိုက်ရပါတယ်။
ထွဏ်းမောင်
(ယခု ဆောင်းပါးအား ၂၀၁၈ ခုနှစ် မတ်လ ၃၀ ရက်ထုတ် မြန်မာသံတော်ဆင့်နေ့စဉ်သတင်းစာတွင် ဖော်ပြပြီး ဖြစ်ပါသည်။)
