ရန်ကုန်တိုင်း၊ လှိုင်သာယာမြို့နယ်ရှိ ထိန်ပင်အမှိုက်ပုံ မီးလောင်နေမှုအား ရပ်တန့်အောင် လုပ်လို့ မရသေးကြောင်းနှင့် တခြားသို့ ကူးစက်ခြင်း မရှိအောင်သာ လုပ်ဆောင်၍ ရကြောင်း ရန်ကုန်တိုင်း စည်ပင်သာယာရေးကော်မတီ၊ ပတ်ဝန်းကျင် ထိန်းသိမ်းရေးနှင့် သန့်ရှင်ရေးဌာန၊ ဒုတိယဌာနမှူး ဒေါက်တာအောင်မြင့်မော်က ပြောကြားထားသည်။
ဧပြီလ ၂၄ ရက်ထုတ် အစိုးရအာဘော် သတင်းစာတစ်ခုဖြစ်သော ကြေးမုံသတင်းစာ၌ ဖော်ပြထားသော သတင်းထောက် ဇာနည်မောင်၊ အေးမင်းသူတို့နှင့် ပြုလုပ်ထားသည့် တွေ့ဆုံမေးမြန်းခန်းတွင် ယင်းကဲ့သို့ ဖြေကြားထားခြင်း ဖြစ်သည်။
“အခုလို မီးလောင်ချိန်မှာ အဲဒီနားကို လူလည်း ကပ်လို့ မရသလို မီးသတ်ကားလည်း ကပ်လို့ မရဘူး။ သွားရင် ကျွံသွားနိုင်တယ်။ ကိုယ်လည်း မမြင်နိုင်ဘူး။ တကယ်လုပ်မယ်ဆိုရင် ဒိုဆာ လေး၊ ငါး၊ ခြောက်စီးနဲ့ လမ်းကြောင်းတွေ ဖွင့်ပြီး ရှင်းထုတ်မှ ရမယ်။ သူ့ကို ငြှိမ်းသတ်ဖို့ဆိုရင် ကျွန်တော် ခန့်မှန်းတာာတော့ အနည်းဆုံး ဧပြီ ၂၇ လောက်မှ လောင်စာကုန်ပြီး မီးလောင်တာ ရပ်သွားလိမ့်မယ်။ လောလောဆယ်တော့ ဘာမှ လုပ်လို့ မရဘူး။ တခြားကို မကူးစက်အောင်ဘဲ လုပ်လို့ရမယ်” ဟု ပတ်ဝန်းကျင် ထိန်းသိမ်းရေးနှင့် သန့်ရှင်ရေးဌာန ဒုတိယဌာနမှူး ဒေါက်တာ အောင်မြင့်မော်က ကြေးမုံသတင်းစာပါ တွေ့ဆုံမေးမြန်းခန်း၌ ဖြေကြားထားသည်။
ထိန်ပင်အမှိုက်ပုံမှာ ဧက ၁၂၀ ခန့်ရှိပြီး ဧက ၈၀ ခန့်မှာ အမှိုက်များဖြင့် ပြည့်နှက်လျက်ရှိပြီး ဧပြီလ ၂၁ ရက်ကတည်းက စတင်မီးလောင်နေခြင်း ဖြစ်သည်။
မီးလောင်နေသည့် ထိန်ပင်အမှိုက်ပုံမှာ ကျင်းတူးမြှုပ်နှံသည့် စုပုံစနစ် ကျင့်သုံးထားသည့်အတွက် အချို့သော နေရာများတွင် အမှိုက်ကျင်းများမှာ အနက်ပေ ၁၅ ပေခန့်အထိရှိပြီး ၀င်ရောက်ငြိမ်းသတ်မည့်သူများအတွက် အန္တရာယ်တစ်ခု ဖြစ်နေသည်။
အမှိုက်ပုံမီးလောင်မှုမှ ထွက်ရှိသည့် မီးခိုးငွေ့များကြောင့် လှိုင်သာယာအပါအ၀င် ယင်းနှင့် နီးစပ်သည့် မြို့နယ်များတွင်လည်း မီးခိုးငွေ့များ ဖုံးလွှမ်းလျက်ရှိပြီး မီးခိုးငွေ့များ ရှုရှိုက်မှုကြောင့် နောက်ဆက်တွဲ ဖြစ်ပေါ်နိုင်သည့် အခြေအနေနှင့် ပတ်သက်၍လည်း “ပြည်သူတွေ အန္တရာယ်မရှိအောင် Mask တွေ တပ်ဖို့ လိုတယ်။ မီးခိုးအနံ့ကြောင့်တော့ ရင်ကျပ်တာတွေ ဖြစ်နိုင်တယ်။ အဆုတ်ရောဂါရှိတယ်ဆိုရင်လည်း ချောင်း ပိုဆိုးနိုင်တယ်။ ရင်ဘက်အောင့်တာတို့၊ အသက်ရှုကျပ်တာတို့ဖြစ်ရင် နီးစပ်ရာဆေးခန်းကို အမြန်ဆုံး ပြသင့်တယ်” ဟု ဒေါက်တာ အောင်မြင့်မော်က တိုက်တွန်းထားသည်။
အောက်ချင်းသစ္စာ သတင်းအေဂျင်စီ
