မြန်မာနိုင်ငံ၏ ၁၀ ဦးမြောက် သမ္မတအဖြစ် အမျိုးသားဒီမိုကရေစီအဖွဲ့ချုပ် NLD ပါတီခေါင်းဆောင် ဦးဝင်းမြင့်ကို မတ်လ ၂၈ က ပြည်ထောင်စုလွှတ်တော်၌ ပြုလုပ်သည့် အစည်းအဝေးတွင် ရွေးချယ်လိုက်ပြီ ဖြစ်သည်။
သမ္မတနှင့် ဒုသမ္မတလောင်းများ ရွေးချယ်ခြင်းကို ဆန္ဒမဲဖြင့် မဲခွဲဆုံးဖြတ်ခဲ့ရာ ဦးဝင်းမြင့်မှာ ထောက်ခံမဲ ၄၀၃ ဖြင့် နိုင်ငံတော်သမ္မတ၊ ဦးမြင့်ဆွေမှာ ထောက်ခံမဲ ၂၁၁ ဖြင့် ဒုသမ္မတ (၁) နှင့် ဦးဟင်နရီဗန်ထီးယူမှာ ထောက်ခံမဲ ၁၈ ဖြင့် ဒုသမ္မတ (၂) အဖြစ် ရွေးချယ်ခံခဲ့ရခြင်း ဖြစ်သည်။ မဲပေးရာတွင် ပယ်မဲ လေးမဲ ရှိခဲ့သည်။
သမ္မတရွေးချယ်ပွဲတွင် အစည်းအဝေးတက်ရောက် မဲပေးခွင့်ရှိသူပေါင်း ၆၅၆ ရှိသည့်အနက် ၆၃၆ ဦး တက်ရောက် မဲပေးခဲ့ခြင်းဖြစ်ပြီး နိုင်ငံတော်၏ အတိုင်ပင်ခံပုဂ္ဂိုလ်ဖြစ်သူ ဒေါ်အောင်ဆန်းစုကြည်နှင့် ပြည်ထောင်စုဝန်ကြီးများ၊ NLD ပါတီခေါင်းဆောင်တစ်ဦးဖြစ်သူ ဦးဝင်းထိန်တို့လည်း လေ့လာသူအဖြစ် တက်ရောက်ခဲ့သည်။
သမ္မတအဖြစ် ရွေးချယ်ခံရသူ ဦးဝင်းမြင့်မှာ ဘူမိဗေဒဘာသာရပ်အထူးပြု သိပ္ပံဘွဲ့ B.Sc ကို ရန်ကုန် ၀ိဇ္ဇာ/သိပ္ပံ တက္ကသိုလ်မှ ရရှိခဲ့ပြီး H.G.P နှင့် R.L ဘွဲ့ရ အထက်တန်းရှေ့နေ၊ တရားရုံးချုပ်ရှေ့နေလည်း ဖြစ်သည်။ ၁၉၉၀ ပြည့်နှစ် ရွေးကောက်ပွဲတွင် NLD ပါတီ ကိုယ်စားလှယ်အဖြစ် ဓနုဖြူမြို့နယ် မဲဆန္ဒနယ် ၁ တွင် ရွေးကောက် တင်မြှောက်ခံခဲ့ရဖူးသည်။ ၁၉၉၃ မှ ၁၉၉၅ ခုနှစ် အမျိုးသားညီလာခံသို့ တက်ရောက်ခဲ့ဖူးပြီး ၁၉၉၆ တွင် နှစ်ကြိမ်နှင့် ၁၉၉၈ မှ ၂၀၀၀ ပြည့်နှစ်အထိ သုံးနှစ်ခန့် တစ်ကြိမ် ဖမ်းဆီးထိန်းသိမ်းခံရဖူးသည်။
၂၀၀၁ ခုနှစ်တွင် NLD ပါတီ၏ ဧရာဝတီတိုင်း စည်းရုံးရေးအဖွဲ့ အတွင်းရေးမှူး၊ ၂၀၁၀ ခုနှစ်တွင် ပါတီ၏ ဗဟိုအလုပ်အမှုဆောင်အဖွဲ့ဝင်အဖြစ်နှင့် ၂၀၁၁ ခုနှစ်တွင် ပါတီ၏ ဗဟိုအောင်နိုင်ရေးအဖွဲ့ဝင်အဖြစ် တာဝန်ပေးအပ်ခံရဖူးသည်။ ယင်းနောက် ၂၀၁၂ ကြားဖြတ်ရွေးကောက်ပွဲတွင် ဧရာဝတီတိုင်း၊ ပုသိမ်မြို့နယ် ပြည်သူ့လွှတ်တော် ကိုယ်စားလှယ်အဖြစ် ၀င်ရောက်ယှဉ်ပြိုင် ရွေးကောက်ခံရဖူးသည်။ ယင်းနောက် ၂၀၁၅ ရွေးကောက်ပွဲအပြီး NLD အစိုးရ တက်လာချိန်တွင် ဥပဒေပြုရေးမဏ္ဍိုင်၏ အထင်ကရ နေရာဖြစ်သည့် ပြည်သူ့လွှတ်တော် ဥက္ကဋ္ဌအဖြစ် တာဝန်ပေးအပ်ခြင်း ခံခဲ့ရဖူးသူ ဖြစ်သည်။
မြန်မာနိုင်ငံ လွတ်လပ်ရေးရပြီးနောက်ပိုင်း သမ္မတတာဝန်ယူခဲ့သူများမှာ ပထမသမ္မတမှာ စ၀်ရွှေသိုက်ဖြစ်ပြီး ယင်းနောက် ဒေါက်တာဘဦး၊ မန်းဝင်းမောင်၊ ဦးနေ၀င်း၊ ဦးစန်းယု၊ ဦးစိန်လွင်၊ ဒေါက်တာမောင်မောင်၊ ဦးသိန်းစိန်နှင့် မတ်လ ၂၁ ရက် နုတ်ထွက်သွားသည့် သမ္မတကြီး ဦးထင်ကျော်တို့ ဖြစ်သည်။
အောက်ချင်းသစ္စာ သတင်းအေဂျင်စီ
