လူထု၏ သတင်းအချက်အလက် ရပိုင်ခွင့်နှင့် ဆက်စပ်၍ သတင်းအချက်အလက် မထုတ်ပေးသည့် အစိုးရ၀န်ထမ်းများကို အရေးယူရန်အတွက် အခက်အခဲ အများကြီး ရှိသေးကြောင်းနှင့် လိုအပ်သလို ဆက်လက်လုပ်ဆောင်မည်ဖြစ်ကြောင်း ပြန်ကြားရေးဝန်ကြီးဌာန ဒုတိယ၀န်ကြီး ဦးအောင်လှထွန်းက ယနေ့ ပြောဆိုလိုက်သည်။
မတ်လ ၂၉ က ပြည်သူ့လွှတ်တော်၌ ကျောက်တန်း မဲဆန္ဒနယ်မှ ဒေါ်အေးမြမြမျိုးက အစိုးရက ပြည်သူလူထုထံ သတင်းအချက်အလက်များ မျှဝေပေးရန် ညွှန်ကြားထားသော်လည်း အောက်ခြေတွင် သတင်းအချက်အလက်များ တောင်းယူရာ၌ ၀န်ထမ်းများက မထုတ်ပေးနိုင်ခြင်းနှင့် ပတ်သက်၍ မည်ကဲ့သို့ အရေးယူမှု လုပ်ဆောင်သွားမည်ကို သိလိုကြောင်း မေးခွန်း မေးမြန်းချိန်တွင် ပြန်ကြားရေးဒုဝန်ကြီးက ယခုကဲ့သို့ ဖြေကြားလိုက်ခြင်း ဖြစ်သည်။
“လက်တွေ့မှာ ကြုံတွေ့နေရတဲ့ အခက်အခဲများကို ပွင့်ပွင့်လင်းလင်း ဆွေးနွေးတင်ပြပေးတဲ့ ကိုယ်စားလှယ်တော်ကြီးကို အထူးပဲ ကျေးဇူးတင်ရှိပါတယ်။ ကျွန်တော် တင်ပြခဲ့တဲ့ အတိုင်းပါပဲ။ ကျွန်တော်တို့မှာ အခက်အခဲတွေ အများကြီး ရှိပါသေးတယ်။ အဲဒါကို လိုအပ်သလို ဆက်လက်လုပ်ဆောင် ဆောင်ရွက်သွားမှာဖြစ်ကြောင်း တင်ပြအပ်ပါတယ်” ဟု ပြန်ကြားရေးဒုဝန်ကြီး ဦးအောင်လှထွန်းက ပြန်လည် ဖြေကြားသည်။
“အများပြည်သူ သတင်းအချက်အလက် ရယူပိုင်ခွင့်နှင့် စပ်လျဉ်း၍ မည်သို့ စီစဉ်ဆောင်ရွက်ထားသည်ကို သိလိုကြောင်း” နှင့် ပတ်သက်၍လည်း ဒေါ်အေးမြမြမျိုးက မေးခွန်းပထမပိုင်းတွင် မေးမြန်းခဲ့ရာ ၀န်ကြီးက “အများပြည်သူ သတင်းအချက်အလက် ရယူပိုင်ခွင့်နှင့်စပ်လျဉ်း၍ ၀န်ကြီးဌာနအလိုက် ပြောရေးဆိုခွင့်ရှိသူများစာရင်းကို ထုတ်ပြန်ထားပြီး ဖြစ်ပါတယ်။ ပြန်ကြားရေးဝန်ကြီးဌာနရဲ့ Web Portal ဖြစ်တဲ့ www.moi.gov.mm မှာ လွှင့်တင်ထားပါတယ်။ ဒါ့အပြင် ပြည်သူအများနဲ့ တိုက်ရိုက်ထိတွေ့ဆက်ဆံရသော ဦးစီးဌာနနဲ့ လုပ်ငန်းများကို ရုံးလုပ်ငန်းများ ဆောင်ရွက်ရန် လာကြတဲ့ ပြည်သူများအနေဖြင့် အဆင်ပြေ လွယ်ကူစေရေးအတွက် သက်ဆိုင်ရာဌာနများရဲ့ ရုံးလုပ်ထုံးလုပ်နည်းများ၊ လုပ်ငန်းစဉ်များနှင့် လိုအပ်တဲ့ သတင်းအချက်အလက်များကို အများပြည်သူ မြင်သာသော နေရာများမှာ ချိတ်ဆွဲပြသထားရန်နှင့် ၀က်ဘ်ဆိုက်၊ ဆိုရှယ်မီဒီယာ အစရှိသော အင်တာနက် လူမှုကွန်ရက်များတွင် ဖော်ပြပေးခြင်းတို့ကို အထူးအလေးထား ဆောင်ရွက်ရန် နိုင်ငံတော်သမ္မတရုံးက ၁၀.၁၀.၂၀၁၆ ရက်နေ့မှာ ဗဟိုအဖွဲ့အစည်းများ၊ ပြည်ထောင်စုဝန်ကြီးဌာနများသို့ လည်းကောင်း၊ ပြည်ထောင်စုအစိုးရအဖွဲ့ရုံးက ၇.၁၀.၂၀၁၆ ရက်နေ့မှာ နေပြည်တော်ကောင်စီ၊ တိုင်းဒေသကြီးနဲ့ ပြည်နယ်အစိုးရအဖွဲ့သို့ လည်းကောင်း အကြောင်းကြားထားပြီး ဖြစ်ပါတယ်” ဟု ပြန်ကြားရေး ဒုဝန်ကြီး ဦးအောင်လှထွန်းက ဖြေဆိုထားသည်။
အောက်ချင်းသစ္စာ သတင်းအေဂျင်စီ
