မြို့နယ် ပြည်သူ့ဆေးရုံဝင်ပေါက်နှင့် ၀င်ပေါက်လမ်းအား ဖျက်သိမ်းကာ ယင်းလမ်းနယ်မြေ နေရာအား ပုဂ္ဂလိကသို့ ရောင်းချထားခြင်းအပေါ် ပြန်လည်စိစစ် အရေးယူပေးရန်နှင့် အဆိုပါ ဆေးရုံဝင်ပေါက်အား ပြန်လည်ဖွင့်လှစ်နိုင်ရေးအတွက် ဆောင်ရွက်ပေးစေလိုကြောင်း စစ်ကိုင်း တိုင်း၊ ကလေးမြို့ ဒေသခံ ပြည်သူတချို့က မြို့နယ်အာဏာပိုင်များထံ ဇွန်လ ၂ ရက် နေ့စွဲဖြင့် အကြောင်းကြားစာပေးပို့ တောင်းဆိုထားသည်။
မြို့နယ်အုပ်ချုပ်ရေးမှူးထံ ပေးပို့သည့် အဆိုပါ အကြောင်းကြားစာတွင် “ယခင်ရှိခဲ့ပြီးသော လမ်း/တံခါးဟောင်းအား ပြန်လည်ဖွင့်လှစ် ပေးနိုင်ပါရန်” ဆိုသည့် အကြောင်းကြားစာတွင် လမ်းနှင့် တံခါးဟောင်းအား ပိတ်ဆို့ထားသဖြင့် ရပ်ကွက်နေပြည်သူများအနေဖြင့် ကျန်းမာရေးနှင့် အခြားကိစ္စရပ်များအတွက် သွားလာကြရာတွင် ဗိုလ်ချုပ်လမ်းနှင့် ပတ္တမြားလမ်း (မိုးဇလလမ်း) အား တစ်ကွေ့တစ်ပတ် အသုံးပြုနေရသဖြင့် အခက်အခဲများ ဖြစ်ပေါ်လျက် ရှိပါသည်” ဟု ဖော်ပြထားသည်။
“ကျွန်တော်တို့ ညောင်ပင်သာရပ်ကွက်မှာ နေထိုင်သူတွေနဲ့ ပြည်သူလူထုအတွက် ကျန်းမာရေး၊ လူမှုရေး၊ မီးရေးထင်းရေးအတွက် တင်ပြတာပါဗျ။ အရင်လည်း ဒီတံခါးဟာ ရှိပြီးသားဖြစ်တယ်။ ဒါကြောင့် ပြည်သူလူထုအတွက် ဆက်လက်တောင်းဆိုမှုတွေ ပြုလုပ်သွားမှာပါ။ ကျွန်တော် ကတော့ ၁၉၇၂ ခုနှစ်က စနေထိုင်ခဲ့တာပါ။ အဲဒီအချိန်က တံခါးဖွင့်ထားပါတယ်။ ၂၀၀၂ ခုနှစ် လောက်မှာ တံခါးပိတ်သွားတယ်” ဟု အကြောင်းကြားစာ ပေးပို့တောင်းဆိုရာတွင် ဦးဆောင်သူ ကလေးမြို့၊ ညောင်ပင်သာရပ်ကွက်နေ ဦးကိုလေးက အောက်ချင်းသစ္စာ သတင်းအေဂျင်စီသို့ ပြောသည်။
အဆိုပါ တံခါးပေါက် မြေနေရာကို ၂၀၀၂ ခုနှစ်က ညောင်ပင်သာရပ်ကွက် ရပ်ကွက်ဥက္ကဋ္ဌဖြစ်သူ ဦးမြင့်သိန်းနှင့် တာဝန်ရှိသူများက ရပ်ကွက်ရုံးဖွံ့ဖြိုးရေးအကြောင်းပြကာ ကျပ် ၈၀၀၀၀ ဖြင့် စာချုပ်စာတမ်းပြုလုပ်ကာ ဦးစန်းလင်းနှင့် ဒေါ်ကေသီတို့အား ရောင်းချထားခြင်း ဖြစ်သည်။
“၂၀၀၂ ခုနှစ်မှာ ညောင်ပင်သာ ရ၀တ ဥက္ကဋ္ဌ ဦးမြင့်သိန်းက ဒီလမ်းကို ရောင်းမယ်လို့ ရပ်ကွက်ထဲ ပြောနေတာကြောင့် ကျွန်တော်၊ လမ်းမြောက်ဘက်က ဦးစီဗာလား၊ ဒေါ်ကေသီတို့ နှစ်ဦးပေါင်းပြီး ရ၀တ ဥက္ကဋ္ဌ ဦးမြင့်သိန်းစီကနေ ၂၇.၉.၂၀၀၂ မှာ အစည်းအဝေးထိုင်၊ ညောင်ပင်သာ ရပ်ကွက်အေးချမ်းသာယာရေးနဲ့ ဖွံ့ဖြိုးရေးအတွက်ဆိုပြီး ငွေ ၈၀၀၀၀ စာချုပ်နဲ့ ၀ယ်ယူခဲ့ပါတယ်” ဟု မြေ၀ယ်ထားသူ ဦးစန်းလင်းက အောက်ချင်းသစ္စာ သတင်းအေဂျင်စီသို့ ပြောသည်။
လတ်တလောတွင် ပိတ်ဆို့ထားသည့် ဆေးရုံတံခါးပေါက်နေရာတွင် ပြည်သူ့ဆေးရုံ စုပေါင်းခွဲစိတ်ဆောင်ကို ဆေးရုံအာဏာပိုင်များက ထပ်မံတည်ဆောက်နေပြီဖြစ်ရာ အဆိုပါ တံခါးပေါက်နှင့် လမ်းအား ပြန်လည် ဖွင့်လှစ်မည်ဆိုပါက အကြောင်းကြောင်းကြောင့် ဆေးရုံလာကြသည့် ဒေသခံပြည်သူများအတွက် ပိုမိုအဆင်ပြေနိုင်မည် ဖြစ်ကြောင်းလည်း ဒေသခံများက သုံးသပ်လျက် ရှိသည်။
 |
| အသစ်ဆောက်လုပ်နေသည့် စုပေါင်းခွဲစိတ်ဆောင် |
သန့်ဇင်ဆွေ
