 |
| Photo by Wa Lone’s Facebook |
ပြည်ပရောက် မြန်မာမိသားစုများက စုစည်းချီးမြှင့်သည့် ၂၀၁၆ ခုနှစ်အတွက် သတ္တမအကြိမ်မြောက် ပြည်သူ့ဂုဏ်ရည်ဆုရှင်အဖြစ် ပင်းတယ ဖန်မီးအိမ်ရှင် ပရိဟတဆရာဝန် ဒေါက်တာသန်းမင်းထွဋ်အား မေလ ၂၁ ရက်က ပြုလုပ်သည့် သတ္တမအကြိမ်မြောက် ပြည်သူ့ဂုဏ်ရည်ဆုပေးပွဲ အခမ်းအနားတွင် ရွေးချယ်လိုက်ပြီ ဖြစ်သည်။
အဆိုပါဆုကို အမည်စာရင်း တင်သွင်းမှုပေါင်း ၁၃၁ ခုအနက်မှ ရွေးချယ်ခဲ့ခြင်းဖြစ်ကာ မြန်မာနိုင်ငံအတွင်းရှိ စေတနာ့ဝန်ထမ်း လူမှုရေးလုပ်ငန်းများအား ကိုယ်ကျိုးစွန့် ဆောင်ရွက်နေသူများအား ဂုဏ်ပြုသည့်အနေဖြင့် ယင်းဆုအား ၂၀၁၀ ခုနှစ်မှစကာ ပေးအပ်ခဲ့ခြင်း ဖြစ်သည်။
ထို့ပြင် ပြည်သူ့ဂုဏ်ရည် အထူးဆုရှင်များအနေဖြင့် မြန်မာပုံပြောသူများအဖွဲ့၊ ပန်းရဲ့လမ်းအဖွဲ့နှင့် နိုင်ငံဖွံ့ဖြိုးတိုးတက်ရေးကဏ္ဍအတွက် ဒေါ်ခင်မမမျိုးတို့အား ရွေးချယ်ခဲ့သည်။
ဆုရရှိသူများကို လာမည့် မေလ ၂၈ ရက်နေ့တွင် ရန်ကုန်မြို့ တော်ဝင်နှင်းဆီခန်းမတွင် ဆုများ ပေးအပ်သွားမည်ဖြစ်ကာ ပြည်သူ့ဂုဏ်ရည်ဆုအတွက် ဆုတံဆိပ်နှင့် အမေရိကန်ဒေါ်လာ တစ်သောင်း၊ အထူးဆုရှင်များအတွက် ဆုတံဆိပ်နှင့် အမေရိကန်ဒေါ်လာ ၁၀၀၀ ချီးမြှင့်သွားမည် ဖြစ်သည်။
၂၀၁၀ ခုနှစ် ပထမဆုံးအကြိမ် ချီးမြှင့်သည့် ပြည်သူ့ ဂုဏ်ရည်ဆုကို နာရေးကူညီမှုအသင်း (ရန်ကုန်)မှ ဦးကျော်သူက ရရှိခဲ့ဖူးပြီး ဒုတိယအကြိမ်ဆုအား လာရောက် တွေ့ဆုံမည့်သူ မရှိသည့် နိုင်ငံရေး အကျဉ်းသားများအား ကူညီပေးနေသည့် ဒေါ်ရှုမှ ရရှိခဲ့သည်။ တတိယမြောက် ပြည်သူ့ဂုဏ်ရည်ဆုကို Kachinland News မှ လဖိုင်နော်မိန် ရရှိခဲ့ပြီး စတုတ္ထအကြိမ်မြောက် ဆုကိုမူ အမျိုးသားဒီမိုကရေစီအဖွဲ့ချုပ် ပညာရေးကွန်ရက်မှ ၂၀၁၃ ခုနှစ်တွင် ရရှိခဲ့သည်။
ငါးကြိမ်မြောက် ပြည်သူ့ဂုဏ်ရည်ဆုရှင်အဖြစ် ၂၀၁၄ ခုနှစ်တွင် ဆည်းဆာရိပ်ဂေဟာမှ ဒေါ်သန်းမြင့်အောင် ရွေးချယ်ခံခဲ့ရပြီး ၂၀၁၅ အတွက် ပြည်သူ့ဂုဏ်ရည်ဆုရှင်ကိုမူ ကျောင်းသားခေါင်းဆောင်တစ်ဦးဖြစ်သူ မဖြိုးဖြိုးအောင်အား ရွေးချယ်ချီးမြှင့်ခဲ့သည်။
အောက်ချင်းသစ္စာ သတင်းအေဂျင်စီ
