 |
| Photo by cedarfund.org |
လာမည့် ၂၀၁၆-၂၀၁၇ ကျောင်းအပ်ရာသီတွင် သူငယ်တန်း KG မှ အထက်တန်းအထိ ကျောင်းဝတ်စုံအပါအ၀င် ကျောင်းသုံးပြဋ္ဌာန်းစာအုပ်များအား အခမဲ့ ပေးအပ်မည်ဖြစ်ကြောင်း ပညာရေးဝန်ကြီးဌာနက ကြေညာထားသည်။
သူငယ်တန်း KG အဆင့်တွင် ကျောင်းသုံးပြဋ္ဌာန်းစာအုပ်များ မလိုအပ်သည့်အတွက် ကျောင်းဝတ်စုံတစ်စုံ အခမဲ့၊ မူလတန်းအဆင့်တွင် ကျောင်းဝတ်စုံအပြင် ဗလာစာအုပ် ခြောက်အုပ်နှင့် ကျောင်းသုံးပြဋ္ဌာန်းစာအုပ် တစ်စုံ၊ အလယ်တန်းနှင့် အထက်တန်းတို့အတွက်မူ ကျောင်းသုံးပြဋ္ဌာန်းစာအုပ် တစ်စုံစီ အခမဲ့ ထုတ်ပေးသွားမည် ဖြစ်သည်။
ထို့ပြင် အလယ်တန်းနှင့် အထက်တန်းတို့အတွက် ကျောင်းလခ၊ မိဘဆရာအသင်းကြေး၊ အားကစားကြေး၊ စာရေးကိရိယာနှင့် စာကြည့်တိုက်ကင်းလွတ်ခွင့်တို့ကိုလည်း ပေးထားပြီး ပညာရေးဝန်ထမ်းများအနေဖြင့် ကျောင်းအပ်နှံသည့် ကျောင်းသား၊ ကျောင်းသူများထံမှ မည်သည့် အခကြေးငွေမှ ကောက်ခံခြင်းမပြုရန်လည်း ပညာရေးဝန်ကြီးဌာနက တားမြစ်ထားသည်။
အလားတူ အတန်းတံဆိပ်နှင့် ကျောင်းတံဆိပ်များအား ရောင်းချခြင်း မပြုရန်အပါအ၀င် အခြား မည်သည့်ပစ္စည်းကိုမှ ရောင်းချခြင်းမပြုရန်ကိုလည်း ပညာရေးဝန်ကြီးဌာန၏ ညွှန်ကြားချက်တွင် ထည့်သွင်းဖော်ပြထားသည်။
ကျောင်းအပ်နှံကြမည့် မိဘပြည်သူများအနေဖြင့်လည်း ငွေကြေးနှင့် လက်ဆောင်များအား ပညာရေးဝန်ထမ်းများအား ပေးအပ်ခြင်းမပြုကြရန်လည်း နှိုးဆော်ထားပြီး မိမိတို့နှင့် သက်ဆိုင်ရာ နယ်မြေများတွင်သာ ကျောင်းအပ်နှံကြရန်လည်း တိုက်တွန်းထားသည်။
အောက်ချင်းသစ္စာ သတင်းအေဂျင်စီ
